BANATE, ILOILO – Nagapanawagan ang pila ka mga barangay officials nga makahatag sang dugang nga trabaho ang gobyerno para sa mga pumuluyo bangud sa indi estable nga pangabuhian sang mga tawo.
Sa Brgy. San Salvador, Banate, Iloilo, 90% sang pumuluyo ang nagasalig gid lamang sa pagpangisda apang bangud sang nagahilapit nga summer season, tama ka gamay sang isda nga mahulik.
Sa interview sang Bombo Radyo Iloilo kay Punong Barangay Rodney Deocampo, iya ginpahayag nga apisar nga mahina ang hulik, nagapadayon sa gihapon sa pagpangisda ang mga pumuluyo bangud amo gid lamang ina ang palangabuhian sang kadam-an sang residente sa lugar.
May yara man sang bulig ang gobyerno pinaagi sa paghatag sang mga gamit sa mga mangingisda apang wala sang financial aide nga ginahatag.
Dugang pa ni Deocampo, wala naman sila nagasalig sa financial assistance bangud tubtob subong, nagahulat sila gihapon sang ayuda sa bagyong Odette.
Tuman man ka gamay ang numero sang mga pumuluyo sa lugar nga may yara sang white collar job ukon ang mga professional kag naga ubra sa opisina.
Bangud sini suno kay Deocampo, ang employment ang dapat nga hatagan sang pagtamud sang gobyerno.
