ILOILO CITY – Ginatun-an pa ni Senate Minority Leader kag Ilonggo Senator Franklin Drilon ang posible pagbutang sang coastal road sa distrito sang Arevalo agud mahatagan ligwa ang trapiko padulong sa banwa sang Oton, Iloilo.
Sa interview sang Bombo Radyo kay Drilon, iya ginpahayag nga ginatan-aw pa lang sa subong ang amo nga plano bangud madamo sang kinahanglan ikonsiderar.
Isa sa mabudlay himuon suno sa senador amo ang pag-relocate sa mga pumuluyo nga maapektuhan sang proyekto.
Imposible naman suno sa natungdan nga road widening pa ang himuon ilabi na sa dalan malapit sa Molo Plaza.
Ang importante suno sa opisyal amo nga mahatagan sang pagtamod ang proyekto bangud ulugtasan na ang dalagan sang mga salakyan sa amo nga dalan.
FLYOVER PROJECTS.
Nagalaum naman si Drilon nga matapos sa sulod sang 18 ka bulan ang duha ka flyover projects sa syudad sang Iloilo.
Ang isa ka flyover ang patindugon sa Brgy. Hibao-an, Mandurriao kag ini ang may kalabaon nga 390 linear meters kag kalaparon nga 10.34 meters.
Ang isa pa ka ka flyover ang natalana nga patindugon sa Brgy. Buhang, Jaro kag ini ang may kalabaon nga 340 linear meters kag kalaparon nga 10.34 meters.
Suno kay Drilon, kapin P1 billion ang budget para sa amo nga mga proyekto.
