ILOILO- Kinahanglan anay nga maghimo sang farm plan ang isa ka tawo nga may tuyo nga magsagod sang mga sapat ukon magtanom sang mga prutas kag utanon.
Ini ang panugyan ni Lea Padohinog Deala, tag-iya sang Deala’s Integrated Farm sa Dingle, Iloilo kag isa ka awardee sang Iloilo Search for Outstanding Rural Women for 2016.
Sa programa Good Morning Philippines, ginpahayag ni Deala nga base sa iya mga natun-an sa mga seminars kag workshops sa nagliligad nga mga tuig, importante ang pagplano lakip na ang paghibalo sang water source ukon ang sarang halinan sang matinlo nga tubig sa lugar.
Sa pagsagod sang sapat suno kay Deala, mas manubo ang gasto kun native nga manok kag baboy ang sagudon.
Magluwas nga pwede sila i-pwesto sa wayang suno kay Deala, iban sa mga baboy ang mahimo lang gani makabun-ag bisan yara ang mga ini sa katubuhan.
Ginpakigbahin man ni Deala nga nagsugod siya sang pormal nga pagsagod sang mga manok sang nakagraduate na ang iya mga kabataan sang 2008 para lang kuntani sa ila consumption.
Sang ulihi, nangin progresibo ang pagsagod niya sang mga ini tubtob nga nangin kaupod na niya ang iban nga mga farmers man sa banwa sang Dingle paagi man sang mga federation kag grupo nga iya ginpakigbahinan.
Suno kay Deala, mas maayo kun tingob ang mga farmers sa subong nga panahon, kaangay sang ululupod nga pagsuporta sa mga programa sang Department of Agriculture (DA), agud ululupod man nga ma-echo ang mga kawsa kag bulig sang gobyerno.
Dugang pa sang natungdan, 1.6 hecatares lang nga lupa ang iya ginpanag-iyahan kag bilang panugyan sa mga tagpalamati, ginpahayag ni Deala nga indi man importante nga tuman gid kalapad ang lote, bangud ang mas maayo amo ang mga diskarte agud mangin produktibo ang pagsagod sang sapat kaangay sang native nga baboy kag darag nga manok.
