ILOILO CITY – Nadugangan pa ang ebidensya sa mga federal cases batuk kay anay United States President Donald Trump matapos naggwa ang audio recording sini nga nagatalakay sang mga sekreto nga dokumento nga iya ginakaptan antes ang pagbiya sa White House.
Ang duha ka minuto nga clip ang nakuha sa isa ka interview sa Bedminster, New Jersey golf club sang Hulyo 2021 para sa mga tawo nga nagahimo sang isa ka memoir nagikan sa iya former chief of staff nga si Mark Meadows.
Lakip sa mga trancript sang recording ang ginkabig nga ebidensya sa 49 ka pahina nga indictment ni Trump sa mga kaso may kaangtanan sa mishandling sang classified documents matapos ang pagbiya niya sa iya opisina.
Sa nasambit nga audio file, mabatian nga kaangay nga ginakaptan ni Trump ang isa ka secret Pentagon document nga may plano nga mag-atake sa Iran.
Ginmitlang man iya ang isa ka butang nga ginlaragway niya nga “highly confidential” kag “secret information” samtang ginapakita sa iban nga tawo sa amo nga hulot.
Suno pa sa iya, gin-ubra ini sang militar kag ginhatag sa iya.
Subong lamang nga bulan, gin-deny ni Trump ang 37 counts sang charges batuk sa iya bangud sang indi maayo nga pagkapot sang United States government secrets.
Kasunod sang paggwa sang audio recording, ginlaslasan ni Trump si special counsel Jack Smith sa iya Truth Social website, kag gintawag ini nga buang.
Gin-akusahan man niya ang prosecutor nga nagapakighimbon sa Justice Department kag sa Federal Bureau of Investigation nga iligal nga nagpagwa sang tape.
Gintawag man niya ini nga panibag-o nga ELECTION INTERFERENCE Scam.
