ILOILO CITY – Ginpangunahan sang National Union of Journalists of the Philippines-Iloilo Chapter kag Commission on Human Rights 6 ang pagpatigayon sang forum kadungan sang ika-10 nga anibersaryo sang Maguindanao Massacre.
Ang nasambit nga aktibidad ang ginpatigayon sa Casa Real De Iloilo kag gintambungan sang mga estudyante sang West Visayas State University – College of Communication kag sang University of the Philippines – Visayas.
Nangin sentro sang forum amo ang pagdumdum sa natabo nga massacre nga ginakabig nga pinakamalala nga election-related incident sa pungsod.
Pagkatapos sang Forum on the 10th anniversary of the 2009 Ampatuan Massacre, may yara sang candle lighting nga ginpatigayon para sa 58 ka mga biktima.
Sa interview sang Bombo Radyo kay Nestor Burgos, national director sang National Union of Journalists of the Philippines-Iloilo Chapter, indi gid malipatan sang mga Pilipino ang adlaw nga Nobyembre 23.
Suno kay Burgos, isa na ka dekada ang nagligad apang wala sa gihapon nahatag ang hustisya para sa mga biktima.
Samtang, suno naman kay Atty. Jonnie Dabuco, regional director sang Commission on Human Rights 6, makabig nga ‘timely’ kun tani ang pagpaguwa sang desisyon sang Quezon City Regional Trial Court kahapon nga adlaw kun wala lang naghingyo sang extension si Hon. Judge Jocelyn Solis Reyes nga amo ang naga-uyat sang kaso.
Gin-grant sang Korte Suprema ang hingyo ni Solis nga extension sa diin suno kay Dabuco, wala sang nagakaigo nga justice rule sa pungsod.
Pagkatapos sang natabo nga massacre, madamo man suno kay Dabuco ang natabo nga media killings nga nagtuga sang chilling effect sa publiko.
