Indi pwede nga makapungko si Senator Jinggoy Estrada bilang judge sa impeachment trial batok kay Vice President Sara Duterte.
Ini ang ginpahayag ni Senate President Sherwin Gatchalian matapos nga nagdagdag ang Sandiganbayan sang 90 ka adlaw nga suspension batok kay Estrada.
Suno kay Gatchalian, samtang suspendido ang isa ka senador, temporaryo man nga nagakadula ang tanan niya nga gahum kag responsibilidad sa Senado.
Buot silingon, indi man siya makapartisipar sa bisan ano nga proseso sang impeachment bilang hukom sang Senado samtang nagapadayon ang iya suspensyon.
“From what I understand, pag suspended ka as senator, kasama na ro’n yung being a senator judge. So the suspension…carries with it all the responsibilities as a senator, including becoming a senator-judge,” suno kay Gatchalian sa press briefing.
“In this case, I haven’t really sat down with our legal team on how to go about it, but ang masasabi ko lang kung ano yung legal practice in the past, yun ang susundan natin,” dugang sang Senate leader.
Ginpahanumdom man sang Senate President nga indi na ini bag-o nga sitwasyon bangud may yara na sang mga nagligad nga kaso sang suspensyon sang mga senador sa nagligad nga mga tuig.
Madumduman nga sang Hunyo 16, nagpaguwa sang preventive suspension ang Sandiganbayan batok kay Estrada may kaangtanan sa kaso nga graft.
Nagaatubang man ang senador sang iban pa nga mga kaso nga plunder nga may kaangtanan sa mga proyekto sang flood control.
Suno sa layi partikular sa Anti-Graft and Corrupt Practices Act, kinahanglan nga temporaryo nga kuhaon sa iya posisyon ang isa ka opisyal samtang ginapaidalom sa trial ang kaso nga graft.
Sa pihak nga bahin, ginpahayag man ni Gatchalian nga padayon nga sundon sang Senado ang Konstitusyon may kaangtanan sa proseso sang impeachment. Kinahanglan gihapon ang boto sang 2/3 sang tanan nga senador agud mahatagan sang sentensya kag mapamatud-an nga may sala ang isa ka opisyal.#
