Ginklaro sang otoridad nga mga hampanganan lamang ang una gin-alegar nga armas kag granada nga nakit-an sa sulod sang isa ka shoulder bag sa entrada sang Guimaras Provincial Capitol sa Barangay San Miguel, Jordan, Guimaras.
Ginpahayag ini sang pulis matapos nga napuhag gid ang mga tawo sa amo nga lugar kaina sang udto.
Sa interview sang Bombo Radyo kay Police Captain Jhona Casono, hepe sang Jordan Municipal Police Station, iya ginpahayag nga gina-review subong ang closed circuit television (CCTV) footage agud mahibaluan kun sin-o ang tag-iya sang bag kag mausisa man kun hungod ini nga ginbilin.
Suno kay Casono, base sa ila nga nakit-an sa lugar, pink ang shoulder bag, may unod nga replica nga hand grenade kag pellet gun, relo, shorts, perfume, kag mga papel.
Pahayag pa sang hepe, may mga nakasulat man sa dokumento gani nga i-check man ini sang pulis para matigayon nga mahibaluan kun sin-o ang tag-iya.
Gin-athag sang hepe nga posible man nga nagpa-picture lang ang tag-iya sa ginatukod nga provincial capitol, apang nalipatan nga kuhaon ukon balikan ang iya bag.#
