ILOILO CITY – Nagaplano ang gobyerno sang Pilipinas nga magbakal sang heavy-lift Chinook helicopters sa Estados Unidos matapos nga ginbasura ang P12.7 billion nga deal sa Russia agud nga malikawan ang sanctions suno kay ambassador Jose Manuel Romualdez.
Sang Hunyo, pila ka adlaw antes ang pagretiro ni anay President Rodrigo Duterte, gin-terminate sang Pilipinas ang deal nga magbakal sang 16 Mi-17 Russian military transport helicopters bangud sang kahadlok sa US sanctions kasunod sang pagsakop sang Russia sa Ukraine.
Sang nagligad nga semana, ginpahayag sang Department of National Defense nga gin-formalize na ang pag-terminate sang contract.
Ginpahayag ni Romualdez nga ang Chinooks amo ang magabulos sa existing hardware nga gingamit sa pagsaylo sang mga tropa kag ginagamit man sa disaster preparedness sa Southeast Asian country.
Ang Estados Unidos ang nakahanda man nga mag-negosyar sa Pilipinas sa balor nga gin-set sa paggasto sa Russian helicopters kag posible nga lakipan pa sang maintenance, service kag parts.
Nagapadayon man ang paghinun-anun sang gobyerno sa Russia agud nga ma-recover ang P2.12 billion nga down payment sa helicopters kun sa diin, ang delivery ang magasugod kuntani sa Nobyembre sa masunod nga tuig ukon duha ka tuig pagkatapos nga napirmahan ang kontrata.
Ang down payment ang mahimo nga magamit sa pagbakal sang mga hinganiban kag indi basta-basta nga pabay-an nalang.
