Ginpasalig sang General Services Office (GSO) nga hawanan ang pedestrian overpass nga yara sa atubang sang Iloilo National High School kag West Visayas State University sa Luna St., La Paz, Iloilo City.
Sa interview sang Bombo Radyo kay Engineer Niel Ravena, head sang GSO, iya ginpahayag nga may team nga ipadala agud nga limpyuhan ini kag sarang liwat nga maagyan sang mga estudyante kag sang mga manunudlo.
Nagdepensa man si Ravena nga ginatinluan man ang nasambit nga overpass apang may yara sang lunok nga nagadaku, nagakamang, kag nagasagabal.
May yara man sang mga nagalihu-liho nga mga tawo nga nagatinir sa amo nga overpass.
Una na nga ginpalab-ot sa Bombo Radyo ang reklamo nga madamo sang nahadlok nga maggamit sini bangud may yara sang tawo nga nagatinir sa lugar kag nagapanglagas sang kutsilyo kag tubo magluwas pa sa ido nga nagapanglagas man.
Ginakulbaan man ang iban nga nagatabok bangud may yara sang natabo nga robbery sa idalom lang sang amo nga overpass.
LIHOK SANG ILOILO CITY COUNCIL
Gin-recognize naman sang Committee on Transportation sa Iloilo City Council nga madugay na nga problema ang amo nga overpass kag wala gid ginagamit sang mga tawo apisar nga nagapugok pirme ang trapiko sa atubang sang duha ka eskwelahan.
Sa interview sang Bombo Radyo kay Councilor Atty. Sedfrey Cabaluna, iya ginpahayag nga malayo ang overpass sa gate sang buluthuan rason nga posible nabudlayan na ang mga estudyante kag ginapili na lang nga mag-diretso tabok sa dalan.
Ginpahayag sang konsehal nga ang mahimo subong amo nga i-lobby ini nga problema sa opisina sang alkalde agud ma-evaluate ang usability sang overpass ukon kun magamit pa ukon indi na.
Sa problema naman sa suga, mahimo ma-tap ang City Engineer’s Office suno sa natungdan agud nga mapasanag ang area kag indi mahadlukan ang mga tawo.
Una naman nga nagpahayag ang La Paz Police Station nga may yara sang mga police personnel nga nagalibot sa pedestrian overpass kag wala man sila sang nabaton nga report nga may yara sang ginhold-up sa amo nga overpass. ##
