Gin-admit sa isa ka ospital sa syudad sang Iloilo matapos nagpositibo sa COVID-19 si Guimaras Governor Samuel Gumarin.
Sa exclusive interview sang Bombo Radyo kay Governor Gumarin, iya ginpahayag nga una na nga naglain ang iya pamatyag sa diin sang nagdesisyon siya nga magpaidalom sa swab test, negatibo ang iya resulta.
Apang bangud nagalain sa gihapon ang iya nga pamatyag, liwat siya nga nagpaidalom sa swab test kag nagwa nga positibo na siya sa COVID-19.
Mild asymptomatic ang kondisyon sang gobernador sa diin wala siya nagaeksperyensya sang pagkadula sang panabor kag pagpanimaho.
Gin-ako man ni Gumarin nga naghulat pa siya bag-o ma-admit bangud halos puno na ang mga ospital sa syudad sang Iloilo.
Pahayag ni Gumarin, ang tanan nga natumod nga close contact niya ang lunsay man ginpaidalom sa swab test.
Sa subong, naga-amat-amat naman rekober sa balatian nga COVID-19 ang gobernador.
Nahibaluan nga fully vaccinated na si Governor Gumarin gamit ang Sinovac COVID-19 vaccine.
