Ginbuyagyag ni Sen. Risa Hontiveros nga may yara sang ginapahayag human trafficking scheme nga ginahimo ang ginaalegar “Chinese mafia” paagi sa pag-recruit sa mga Pinoy bilang mga “scammers” sa Myanmar.
Gingamit ni Hontiveros ang testimonya sang 12 ka mga Pinoy nga na-rescue halin sa alleged syndicate nga naga-operate sa Myanmar.
Suno sa senador, sang yari pa lang sa Pilipinas, ginpangakuan ang mga Pinoy sang trabaho sa customer service representative ukon data encoder.
Apang pag-abot sa Thailand kun sa diin ila gindumdom nga maga-trabaho na sila, gindala sila sang Chinese mafia sa Myanmar agud himuon nga mga scammer nga nagagamit sang crypto currency.
Ginpahayag pa nga ginpagutman pa ang mga Pinoy kag wala ginaswelduhan kun mapaslawan sila nga ma-scam ang pila ka mga indibidwal.
Suno pa sa senador, ginpili sang mga sindikato ang mga Pinoy bangud sa proficiency sa English language.
Kasunod sini, nanawagan si Hontiveros sa concerned government agencies nga aktuhan ini nga problema.
