ILOILO CITY- Gin-athag ni Iloilo City Police Office director PCol Joeresty Coronica nga ang regional headquarters ang may direct supervision sa pagpatigayon sang imbestigasyon angot sa pulis nga nagpangtaya-taya kag nagpalupok sang service firearm sa Buntatala, Jaro,Iloilo City.
Ang pulis amo si PSSgt. Nico Galvesolo, 38 anyos, residente sang Block 5-B, Relocation Site, Barangay Buntatala, Jaro, Iloilo City.
Sa interview sang Bombo Radyo kay PCol Coronica, iya ginpahayag nga ang Internal Affairs Service ang nagapatigayon sang motu proprio investigation.
Suno kay Coronica, ini bangud indi niya personnel si Galvesolo bangud yara ini sa idalom sang General Services Office sang regional headquarters.
Pahayag ni Coronica, sa ila bahin sa Iloilo City Police Office, nagaproseso sila sang reklamo sang complainant kag ginahatag ang report sa Regional Internal Affairs Service nga amo ang magauyat sang kaso.
Gindugang man niya nga pareho nga kaso kriminal kag administratibo ang mahimo atubangon ni Galvesolo.
Una na nga nagpasaka sang kaso nga illegal discharge of firearms ang Jaro Police Station.
Ini apisar nag-isyu sang affidavit of no interest sa pagpasaka sang kaso ang mga tagreklamo nga gintayaan niy sang pusil.
