Ginpanindugan sang Iloilo City Police Office (ICPO) ang nauna nga statement sini nga indi maka-alarma ang iligal nga droga sa syudad sang Iloilo.
Matandaan nga si ICPO officer-in-charge Police Colonel Wilbert Parilla ang una nga nagpahayag sini subong nga semana.
Gin-ulan sang magkatuhay nga mga komento ang amo nga pahayag ni Parilla ilabi na bangud sa bag-o lang natabo nga insidente sang pagbun-anay sang duha ka mag-pamilya sa San Isidro, La Paz sang Sabado sang gab-i nga nagbilin sang apat ka mga patay.
Nag-ugat ang amo nga krimen sa ginapahayag palpak nga transaksyon sa shabu nga nagabalor sang P1,500.
Sa meeting naman sang mga punong barangay sa Lapuz nga naka-sentro sa diskusyon kun makaalarma ukon indi ang droga diri sa syudad, nangin tiglawas ni Parilla si Police Lieutenant Colonel Lorenez Losaria nga amo ang deputy city director for operations sang ICPO.
Tatlo ka bagay ang ginplastar sini nga mahimo gamiton nga rason suno sa iya nga masiling nga alarming na ang droga.
Una, dapat nga kinilo-kilo na sang droga ang makumpiskar; ikaduha, kun may mga opisyales ukon dalagku nga personalidad nga involved sa illegal drugs; kag ikatatlo, kun may mga opisyal nga nadakpan mismo sa operasyon.
Pahayag sini, tag-gamay lang ang na-recover sa Iloilo City kag magamay lang nga users indi pareho sa iban nga lugar kun sa diin may mga barangay officials pa nga involved.
‘NAPANAS SANG TYEMPO NI DUTERTE’?
Gin-ugyunan naman sang presidente sang Association of Barangay Captains (ABC) sa Lapuz ang ginapanindugan sang ICPO.
Sa interview sang Bombo Radyo kay Punong Barangay Arnel Asturias nga amo ang nagpatawag sang meeting agud istoryahan ang amo nga isyu, iya ginpahayag nga suportado sang data ang statement ni Losaria sang nag-atubang ini sa ila.
Suno pa kay Asturias, kun lantawon sang naglinigad nga mga tinuig, may yara pa gani sang mga dalagku nga mga personalidad nga nagakontrol sa Iloilo pag-abot sa iligal nga droga.
Pahayag pa ni Asturias, nagsiling ang ICPO nga wala na sang ma-identify sa Iloilo subong nga amo ang nagakontrol sa diin man nga areas kun droga ang hambalan.
“Kun tan-awon naton, napanas ni sang tyempo ni [former President] Digong Duterte. Nagpalagyo gani ang iban kay nahadlok, kay pila ka drug personalities sa aton ang napatay. Ang iban nagpalagyo. That’s why ang iya explanation, indi alarming ang iligal nga droga,” suno kay Asturias.
Sang ginpamangkot ini kun may kilala siya nga nagpalagyo, sabat ni Asturias: “Indi ta nalang na paghambal, kay bisan sin-o daw nakabalo man. May ara man ta gani kilala nga sang una nagpalagyo man pero sang nagligad nag-spokesman spokesman man sa babaw nga nakibot man kita.”
‘PARA SA AKON, ALARMING’
Una na nga ginpahayag ni Iloilo City Lone District Representative Julienne “Jamjam” Baronda nga makig-istorya ini kay Parilla agud maathagan kun ano ang buot silingon nga indi alarming ang illegal nga droga sa syudad.
Suno pa sa iya, sa pagpakighinun-anon sini sa mga pumuluyo, nagahambal ang mga ini nga tuman ka makalarma ang illegal nga droga sa syudad kag indi na safe.
Ginpahayag man sini nga kaangay nga wala sang kahadlok ang mga tawo nga nagagamit sang droga kun sa diin may nagakatabo nga pagpinatyanay kag iban pa nga krimen.
Gindugang sang kongresista nga magapatigayon ini sang privilege speech kun indi pa ma-address ini nga problema.#
