ILOILO CITY – Ginpasalig sang Iloilo City Government ang bug-os nga suporta sa pagpatuman sang traffic discipline zone sa Sen. Benigno Aquino Avenue, Mandurriao, Iloilo City tubtub sa Ungka Pavia, Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga nagakadapat nga ipakita sa tanan nga ang mga pumuluyo sa syudad ang nagasunod sa mga layi sa dalanon.
Suno kay Treñas, tuman ang iya pagpasalamat sa hugot nga suporta nanday Public Safety and Transportation Management Office (PSTMO) Head Jeck D. Conlu; Iloilo City Police Office (ICPO) Director Police Col. Martin Defensor Jr.; Regional Highway Patrol Unit Chief PCol. Winston de Belen; kag Land Transportation Office 6 Regional Director Roland Ramos.
Ginpahayag ni Treñas nga iya naman napirmahan ang total seminar design sang Highway Patrol Group (HPG), ICPO, kag PSTMO agud mas mahatagan pa sang madamo nga ideya ang mga otoridad sa pagpatuman sang layi sa trapiko.
Dugang pa sang natungdan, magabakal sang dugang nga mga motorsiklo ang Iloilo City Government agud malagas sang madasig sang mga opisyal ang mga pasaway nga motorista.
Positibo naman si Treñas nga mangin panugod na ini agud mapatuman man ang traffic discipline sa iban pa nga dalanaon sa syudad.
Nahibaluan nga gamiton naman ang breath analyzer agud mahibaluan ang blood alcohol concentration sang isa ka driver kag speed gun agud matumod ang kadasigon sang isa ka salakyan.
Ang speed limit sa 2 outer lanes ang 50 kilometros kada oras kag 60 kilometros kada oras naman sa 2 innermost lanes.
