ILOILO CITY – Magahatag sang bulig ang Iloilo City Social Welfare Development Office sa mga pamilya nga apektado sang sunog nga nagluntad sa Zone 2, Brgy. Sambag, Jaro, Iloilo City kaina sang aga.
Sa interview sang Bombo Radyo kay Terrie Gelogo, Field Operation In-charge sang City Social Welfare Development Office, iya ginpahayag nga may ara food kag non-food assistance ang ila pamunuan nga igapakigbahin sa mga biktima.
Suno kay Gelogo, P10,000 ang igahatag sa pamilya nga totally burned ang balay kag P7,000 ang para sa pamilya sang partially burned.
Samtang, hatagan man sang P10,000 bilang burial assistance ang pamilya ni Chuchi Ventura, 74 anyos, nga nagtaliwan bangud una na nga ginpahayag gin-atake sa tagipusuon sang nagluntad ang insidente.
Dugang ni Gelogo, nagapanguna gid nga kinahanglanon subong sang mga biktima amo ang bayo, mga gamit, kag pagkaon.
Nahibaluan nga pulo ang totally burned nga mga balay, samtang apat naman ang partially burned.
