Nagbuylog ang Iloilo Provincial Government sa nationwide nga Earth Hour agud mapasangkad ang ihibalo sang mga Ilonggo sa climate change.
Ang kahiwatan ang ginhiwat sa Iloilo Provincial Capitol.
Isa sa nangin dinapit nga bisita amo si Iloilo Provincial Environmental and Natural Resources Office (PENRO) Head Atty. Cesar Emmanuelle Buyco Jr.
Sa iya mensahe, ginpunto sini ang importansya sang Earth Hour, kon sa diin, isa ka dako nga palaagyan agud makabulig sa planeta ilabi na nga naga-eksperyensya ang kalibutan sang tuman nga pag-init.
Ginpahayag man sini nga sugod sang 2024, yara na sa 116,273 hours ang napatigayon Ligum Dulom ukon Earth Hour sa pungsod.
Lakip sa kahiwatan amo ang aktibidad nga Zumba for the Earth nga naghatag man sang kalingawan sa kadam-an.
Nagpakigbahin man sang talento ang Pughanan Rondalla paagi sa acoustic jamming.
Naglawig sugod alas-8:30 tubtob alas-9:30 ang Earth Hour nga ginbuylugan sang nagkalain-lain nga organisasyon sa Iloilo.
Nagtambong man ang Metro Iloilo Water District (MIWD) sa ginpatigayon nga Earth Hour sa Iloilo Provincial Capitol.
Suno kay Mr. Alfredo Tayo, General Manager sang MIWD, iya ginpahayag nga ang isa ka oras nga pagpatay sang mga suga ang dako nga bulig para sa kalibutan.
Dugang sini nga ang tikang ang isa man ka paagi agud nga mabuhinan ang paggamit sang fossil fuel sa electric power.
Ginpahayag man sini nga ang tuman sang paggamit sang fossil fuel ang makapatunaw man sang glaciers sang kalibutan.
Ini ang nagatuga man sang pagtaas sang lebel sang tubig sa bilog nga kalibutan nga nagaapekto sa minilyon ka mga pumuluyo nga yara sa coastal areas.
