ILOILO CITY- Diskusyunan liwat sang Sangguniang Panlalawigan ang kontrobersyal nga signal jamming sa syudad sang Iloilo kadungan sang Dinagyang Festival 2023 highlights.
Sa interview sang Bombo Radyo kay ex- officio Board Member Ramon Sullano, chairman sang Committee on Transportation,Communication and Public Utilities sa Iloilo Provincial Board, iya ginpahayag nga imbitaron nila ang tiglawas sang National Telecommunications Commission, telecomunications company, amo man ang Iloilo City Government kag ang tiglawas sang mga Local Government Units nga naapektuhan sang signal jamming.
Suno kay Sullano, katuyuan nila nga makapangayo sang paathag kun ngaa nadalahig ang pila ka banwa sa Iloilo apisar nga sa syudad lang kuntani ang sakop sang signal shutdown base sa resolution nga ginpasar sang Iloilo City Council bilang sabat sa hingyo sang Iloilo City Police Office.
Dugang ni Sullano, ipatawag man niya ang mga food delivery riders nga nadulaan man sang palangitan-an bangud sa signal jamming.
Natalana sa Mierkules,Pebrero 1 ang amo nga committee hearing nga ginpatawag sang Joint committee nga amo ang kumitiba nga ginapamunuan ni Sullano kag ang Committee on Public Order and Security nga ginapamunuan naman ni Board Member June Mondejar.
