Wala sang may na-record ang Commisson on Election (COMELEC) Province of Iloilo sang nag-file sang kandidatura sa pinaka-una nga adlaw sang filing sang certificate of candidacy.
Sa interview sang Bombo Radyo kay Atty. Renier Layson, Provincial Election Supervisor IV- COMELEC Province of Iloilo, iya ginpahayag nga apisar sang wala sang may nag-file, makabig sa gihapon sini nga madinalag-on ang una nga adlaw sang kahiwatan.
Suno kay Layson, wala sang may nakit-an nga problema ang talatapan bangud man sa matalunsay nga koordinasyon sa kapulisan, election partners, kag stakeholders.
Nakabaton naman ang talatapan sang reports nga maga-file sang kandidatura si Iloilo 5th District Representative Raul “Boboy” Tupas sa Oktubre 3, 2024.
Samtang, sa Oktubre 7 naman maga-file sang candidacy ang grupo nanday Iloilo Governor Arthur Defensor, Jr. kag tandem sini nga si Anilao Mayor Lee Ann Debuque.
May duha naman ka mga na-record nga nag-file sang candidacy sa mayoralty sa pila ka banwa sa probinsya.
Ini amo sanday Passi City Mayor Stephen Palmares kag Maasin Mayor Francis Amboy.
Nahibaluan nga may yara na sang 128,165 ka mga voter’s registration ang na-record sang Provincial COMELEC sa Iloilo sugod sang Pebrero tubtob sang nagtakop ini sang nagligad nga Setyembre.
