ILOILO CITY – Indi mahimo nga mag-isyu sang franchise ordinance ang Iloilo City Government agud maghatag sang prangkisa sa South Balibago Resources Incorporated (SBRI), isa ka pribado nga water utility sa Jaro, Iloilo City.
Ini ang napamatud-an paagi sa desisyon nga ginpapanaug sang Iloilo City Regional Trial Court nga nagadeklarar sang Ordinance No. 2016-118 bilang “null and void”.
Sa interview sang Bombo Radyo kay Atty. Roy Villa, corporate legal counsel sang Metro Iloilo Water District (MIWD), iya ginpahayag nga franchise ordinance lang ang sakop sang amo nga mandu sang korte.
Pahayag ni Villa, mahimo sa gihapon sa magpadayon ang mga development nga ginapatigayon sang SBRI bangud may yara sang Certificate of Public Convenience (CPC) ang amo nga water utility nagikan sa National Water and Resources Board.
Nahibaluan nga ginpapanaug ang franchise ordinance sa idalom sang administrasyon nanday anay Iloilo City Mayor Jed Mabilog kag anay Iloilo City Mayor Jose Espinosa III.
