ILOILO CITY – Wala sang naga-monitor sa sitwasyon sang mga Ilonggo Overseas Filipino Workers (OFWs) nga gin-repatriate kag ginpahamtang sa isa ka hotel sa Iloilo City Proper para sa 14 ka adlaw nga quarantine.
Sa interview sang Bombo Radyo kay Iloilo City Mayor Jerry Treñas, iya ginpahayag nga may mga report siya nga nabaton nga nagasuprer na sang ubo kag sakit sang ulo ang iban nga repatriates apang wala sang daily temperature check nga ginapatigayon.
Ginagutman man ang mga OFWs suno kay Treñas bangud wala ginahatag sa insakto nga oras ang pagkaon.
Suno kay Treñas, bangud wala sang koordinasyon nga ginhimo ang Department of Health (DOH) kag ang Overseas Workers Welfare Administration (OWWA) sa local government unit (LGU) sang ginpabalik sa syudad sang Iloilo ang amo nga mga OFWs subong nga semana, una niya nga gindumdom nga ang mga opisyal na sang nasambit nga mga pamunuan ang bahala sa pag-atipan sa mga natungdan.
“Waay gid kami ni sang koordinasyon. Te basi ang OWWA kag ang DOH na, ” pahayag ni Treñas.
Pahayag sang akalde, bangud indi niya luyag nga mabutang sa risgo ang ikaayong lawas sang mga Ilonggo sa amo nga quarantine facility, handa ang Iloilo City Government agud magpanagtag sang pagkaon paagi sa sa kitchen patrol sang syudad.
Suno kay Treñas, may yara sang 90 ka mga Ilonggo sa amo nga lugar kag 35 sa mga ini ang taga-syudad sang Iloilo.
Nadesisyunan sang Iloilo City Government nga sakupon sa paghanda sang food packs ang mga taga-probinsya.
Sa bahin naman sang swab test, ginhingyo ni Treñas sa Western Visayas Medical Center (WVMC) nga kun mahimo, unahon sa pag-run ang specimen sang amo nga mga OFWs apang tubtob subong, wala pa ang resulta sang iban.
Kun maglain ang pamatyag sang repatriates, ginpahayag ni Treñas nga posible isaylo ang mga ini sa WVMC bangud posible nga infected ang mga ini sang coronavirus disease 2019 (COVID-19).
Nagpasalig si Treñas nga magapungko ang LGUs kag sang local Inter-Agency Task Force (IATF) agud maistoryahan ang nagakaigu nga bulig para sa amo nga mga repariates.
“Daw nagdamo ang problema no? Ang akon siguro, bilang alkalde, naintindihan ta man nga basi nabudlayan na na to sila sa Manila kay te damo ang OFWs kag seafarers. Siguro pungkuan na man lang ni kag bulululigan. Mabudlay pero plastaron ta man lang ‘ni kun ano.”
