Nasapwan nga wala na sang kabuhi ang isa ka Indian national sa sulod mismo sang iya nga balay sa Villa Paterna Subdivision, Brgy. Cano-an, Estancia, Iloilo.
Ang biktima ang ginapahayag masobra isa na ka tuig nga nagatinir sa Estancia bangud sang iya nga negosyo, apang sa Roxas City, Capiz ang iya nga pamilya.
Sa interview sang Bombo Radyo kay Police Lieutenant Jobert Amado, hepe sang Estancia Municipal Police Station, iya ginpahayag nga ginlaslas ang liog sang biktima kag may madamo nga pilas tuga sang pagkabuno sa wala kag tuo nga dughan kag wala kag tuo nga kamot.
Ang kutsilyo ang ginapahayag nagaungot pa sa iya nga likod.Ginapahayag sang pulis nga posible apat ukon lima ka tawo ang nagpatay sa biktima.Isa sa ginalantaw motibo amo ang pagpangawat.
Sandig sa imbestigasyon, bukas ang pwertahan sang balay kag wala man sang indikasyon nga ginpilit ini nga buksan.
Ginalantaw sang mga pulis nga kilala sang biktima ang suspek ukon isa sa mga suspek.
Nakit-an nga may kuwarta sa salakyan sang biktima, kag ginalantaw sang mga pulis nga wala sang nakit-an ang mga suspek nga kuwarta sa sulod sang balay kag posible rason nga ginpatay na lang ang biktima.
Ang nakasapo sa bangkay sang biktima amo ang kaupod niya nga nagapangolekta sang ila mga pautang. May persons of interest na nga ginasundan ang mga pulis.##
