𝗡𝗨𝗘𝗩𝗔 𝗩𝗔𝗟𝗘𝗡𝗖𝗜𝗔, 𝗚𝗨𝗜𝗠𝗔𝗥𝗔𝗦 — Natalana na sa Hunyo 29 tubtob 30, 2024 ang International Open Water Swim Circuit sa Taklong Island National Marine Reserve sa Nueva Valencia, Guimaras.
Suno kay Department of Tourism Region 6 Director Crisanta Marlene Rodriguez, ang ini nga event ang indi lang magapakita sang open water swimming bilang sport, sa baylo ini man ang magapakita sang environmental sustainability kag community engagement, amo man ang pag-promote sang Guimaras bilang isa sa mga top tourism destinations sang rehiyon.
Ang event pahayag niya ang limitado lamang sa 150 participants.
Sa interview sang Bombo Radyo kay Nueva Valencia Mayor Paul Vincent De la Cruz,iya ginpahayag nga ang International Open Water Swim Circuit ang magapasangkad pa sang industriya sang turismo sang banwa ilabi pa nga ipakita diri ang katahom sang isla.
Pahayag sang alkalde, tinguhaan nila sa banwa sang Nueva Valencia nga mapainan sang cash prizes ang mga magadaog sa amo nga sport event.
Gin-athag man sang natungdan nga sa Hunyo 30, eksklusibo anay ang gamiton sang mga participants kag DOT ang Taklong Island National Marine Reserve, buot silingon isirado anay ini para sa mga wala nalakip sa amo nga event.
