ILOILO CITY- Nagdepensa ang Iloilo Police Provincial Office sa alegasyon sang pamilya sang mag-utod nga subject sa search warrant operation sa Passi City sang damlag lang nga planted ang tanan nga mga armas kag granada nga narekober sang otoridad.
Matandaan nga Agosto 12 ginpatigayon sang Passi City Police Station kag Special Operations Group ang pagserbe sang search warrant batok sa mag-utod nga Neptalie kag Jeffrey Barrios sa Brgy. Agtabo sa amo nga syudad may kaangtanan sa paghupot sang mga armas kun sa diin narecover sa ila ang duha ka 38 caliber revolver, isa ka rifle submachine gun, isa ka 9mm pistol, isa ka granada, mga bala kag magazine.
Ang duha ang suspek sa strafing sa balay sang pamilya Gonzales sa Barangay Braulan, San Enrique, Iloilo sang Hulyo 30 kun sa diin duha ka menor de edad ang nasamaran.
Sa interview sang Bombo Radyo kay PCol Ronaldo Palomo, direktor sang Iloilo Police Provincial Office, iya ginpahayag nga imposible nga makapang-planted ang operating team bangud kun basehan ang mga recoveries, imposible ini nga matago kag ibutang sa sulod sang balay sang mga subjects.
Suno kay Palomo, nagsunod gid sa protocol ang operatiba, may presensya sang barangay official kag may body-worn camera pa ang mga katapo sang operating team.
Ginkatingala naman ni Palomo kun paano nakakuha sang abogado halin sa Manila ang pamilya Barrios bangud nga ginasiling sang mga ini nga pigado lang ang ila pangabuhi.
Nahibaluan nga ang ila abogado amo si Atty. Jesus Obejero nga nagpakilala man nga abogado sang self- confessed drug lord nga si
Kerwin Espinosa.
