Naghingyo si suspended Bureau of Corrections (BuCor) Director General Gerald Bantag nga indi magpahilabot ang panel sang investigators sang Department of Justice (DOJ) sa pag-uyat sang murder complaints nga gin-file batok sa iya kasunod sang pagpatay sa broadcast journalist nga si Percy Lapid kag sa ginaalegar middleman nga si Jun Villamor.
Si Senior Assistant State Prosecutor Charlie Guhit mismo ang nagkumpirma nga nakabaton sila sang motion for inhibition sang panel of prosecutors halin sa kampo ni Bantag.
Luyag ni Bantag nga indi magpahilabot ang DOJ panel bangud sa lack of jurisdiction.
Suno pa sa kampo sang suspended BuCor director, ang Office of the Ombudsman ang may yara sang jurisdiction kay Bantag.
Ginmensyonar man sa motion ang indi paghangpanay sa tunga nanday Bantag kag Justice Secretary Jesus Crispin Remulla.
Ginpahayag sang kampo ni Bantag nga wala sila sang malauman nga justice, impartiality, kag fairness halin sa DOJ bangud magkaaway si Bantag kag si Remulla nga amo ang nagapamuno sa amo nga ahensya.
Sabat naman ni Remulla, may obligasyon sila sa layi kag sa Constitution, kag wala man sang himuon nga wala naka-base sa anuman nga ebidensya.
