ILOILO CITY – Hingagawon sang City Social Welfare and Development Office nga masaylo sa mga hotel ang mga residente nga naapektuhan sang oil spill sa Bo. Obrero, Lapuz, Iloilo City.
Sa interview sang Bombo Radyo kay Marian Penit, Social Welfare Officer 3 sang City Social Welfare and Development Office, iya ginpahayag nga 28 ka pamilya ang nabilin sa Bo. Obrero Elementary School samtang 70 naman ka pamilya ang nabilin sa Jalandoni Memorial Elementary School apang mahimo nga tubtub na lang buwas nga adlaw, Hulyo 11, ang pagtinir nila sa evacuation center kag sila ang pagasayluhon na sa hotel.
Suno kay Penit nga may naka reserba na nga hotel room apang mahinay lang ang pagsaylo sa mga evacuees bangud sa ginasunod nga protocol sang mga hotel.
Umpisa buwas nga adlaw, ginpahayag ni Penit nga ang hotel na ang magahatag sang pagkaon sa mga evacuees kag ang AC Energy na ang magabayad sang bill.
Santo sa tally nga nauyatan sang natungdan, 343 ka pamilya ang apektado sang oil spill apang ang iban sa ila ang nagpauli na lang sa ila balay bangud sa personal nga rason.
