MANILA – Ginkumpirma ni Presidente Rodrigo Duterte nga naglab-ot na sa 24 ang positibo nga kaso sang Coronavirus Disease 2019 sa pungsod Pilipinas.
Ang kumpirmasyon ang ginhimo sang presidente pila ka oras matapos gin-anunsyar sang Department of Health ang bag-o nga napulo ka kaso sang lunsay Filipino nga mga pasyente kag matapos man nga ginpatigayon ang pagsinapol kaupod ang Inter-Agency Task Force for the Management of Emerging Infectious Diseases.
Suno kay Duterte, ang reported nga mga bag-o nga kaso ang yara sa West Crame, San Juan, Sta. Maria, Bulacan, kag Project 6, Quezon City.
Kaangot diri, gin-anunsyar man ni Duterte ang pagsuspinde sang mga klase sa tanan nga level sa National Capital Region halin subong nga adlaw, Marso 10, tubtob sa Marso 14, agud matapna na ang paglapta sang virus sa Metro Manila.
Nahibaluan nga una na nga gin-deklarar sang presidente ang state of public health emergency sa bilog nga pungsod.
Nahibaluan man nga sa nauna nga press briefing sang Department of Health kahapon, ginpahayag ni Health Assistant Secretary Maria Rosario Vergeire nga ang pulo ka bag-o nga kaso ang lunsay Filipino nga mga pasyente — kalabanan ang nagaedad sang 24 anyos tubtob 72 anyos, walo ang lalaki kag duha ang babayi.
Suno pa kay Vergeire, nagapadayon ang contact tracing sa subong kag hugot man nga nagapakig-angot ang Department of Health sa apektado nga mga local government unit.
Apat sa ginatumod nga mga pasyente ang na-admit sa Makati Medical Center, duha sa Tricity Medical Center sa Pasig City, duha sa UniHealth Parañaque Hospital, isa sa The Medical City sa Ortigas, kag isa sa Research Institute for Tropical Medicine.
Pahayag pa sang pamunuan, kalabanan sang mga pasyente anng nakabatyag sang sintomas sang coronavirus disease 2019 sa katapusan nga bahin sang Pebrero kag una nga semana sang Marso.
Ang iban sa mga pasyente ang nakapadulong sang damlag lang sa mga pungsod nga apektado sang nasambit nga virus kaangay sang United Arab Emirates, Australia, Taiwan, kag Japan.
