ILOILO CITY – Patay ang isa ka miyembro sang New People’s Army samtang dakop naman ang pito ka persona lakip ang pila ka menor de edad matapos ang nagluntad nga engkwentro sa tunga sang Philippine Army kag ginabanta 40 nga katapo sang Suyak Platoon, Southern Front, Komiteng Rehiyon-Panay sa pagpamuno ni Joven Ceralvo alyas Lex sa Sitio Anoy, Brgy. Cabalaunan, Miagao, Iloilo.
Sa interview sang Bombo Radyo kay Lt. Col. Joel Benedict Batara, Commanding Officer sang 61st Infantry Battalion sang Philippine Army, iya ginpahayag nga nagluntad ang engkwentro matapos ang ila nga clearing operation matapos nakabaton sang impormasyon nga may recruitment sang mga rebelde nga grupo sa nasambit nga lugar.
Suno kay Batara, ginakabig ang nasambit nga lugar nga training camp sang mga gina-recruit sang New People’s Army sa diin target nila ang mga menor de edad.
Ginpahayag ni Batara nga nakuha sa nasambit nga lugar ang nagkalain-lain nga armas nga ginalakipan sang M1 Granade Rifle, KG 9 Sub Machine gun, Caliber 45 pistol, duha ka 12 Gauge Shot gun, pistolised home made shot gun, duha ka improvised explosive device (IED), pito ka backpacks, duha ka bandolier, duha ka hayahay sang New Peoples Army, mga medical paraphernalia kag subversive documents.
Ginapahayag nga sa Antique nagpalagyo ang mga rebelde kausnod sang natabo nga engkwentro.
