ILOILO CITY – Magapatindog ang syudad sang Iloilo sang isa ka laboratoryo nga mahimo patigayunan sang test para sa coronavirus disease 2019 (COVID-19) kag iban pa nga balatian.
Sa interview sang Bombo Radyo kay Iloilo City Mayor Jerry Treñas, iya ginpahayag nga nagapakig-angot siya sa Department of Health (DOH) Region 6 agud mahitso ang plano kag masuguran na sa “labing-madali nga panahon”.
Suno kay Treñas, apisar ginalauman nga matapos na ang pagpatuman sang enhanced community quarantine (ECQ) sa syudad sa Mayo 15, ginapanan-aw nga may yara man sa gihapon sang kaso sang COVID-19 sa Iloilo, rason nga kinahanglan ang mass testing.
Magluwas sa nasambit nga balatian, mahimo man nga akomodaron sang laboratoryo ang pag-test para sa human immunodeficiency virus (HIV), tuberculosis (TB), kag dengue.
Pahayag pa sang alkalde, may yara na subong sang layout nga nahatag ang DOH Region 6 kag ini ang ginsunod man sa Research Institute for Tropical Medicine (RITM).
Suno kay Treñas, ipatindog gid ang amo nga building bangud may yara ini sang specific design.
Ipahamtang sa distrito sang Molo ang amo nga laboratoryo nga magaunod na sang kompleto nga mga equipment lakip na ang polymerase chain reaction (PCR) machine.
Ginabanta nga magalab-ot sa P15 million- P20 million ang mahimo gastuhon para sa pagpatindog sang amo nga laboratoryo.
Sa bahin naman sang mga medical technologists nga amo ang idesignar sa lugar, pilion suno sa alkalde ang “best of the best” kag ipahanas sa RITM.
Nahibaluan nga santo sa data sang DOH-6, sa subong, Mayo 6, naglab-ot na sa 15 ang kaso sang COVID-19 sa syudad sang Iloilo kag isa ang narecord nga patay.
