ANTIQUE – Patay ang isa ka lalaki matapos nga gintiro sang pulis sang ginrespondehan ini bangod ginapahayag nagapamahog gamit ang kutsilyo sa Poblacion, San Remigio, Antique.
Ang napatay ang ginkilala kay Reynaldo Marquino, ginabanta 50 anyos ang edad, residente sang Sitio Durog, Brgy. Iguirindon, San Remigio, Antique.
Sa interview sang Bombo Radyo kay Police Captain Janvier Gilsa, officer-in-charge sang San Remegio Municipal Police Station, iya ginpahayag nga nagapatigayon sang mobile patrol ang duha ka mga kapulisan nga amo sanday PCpl Sherwin Puyong kag Pol Cpl Agaton Caminian sang may nagpalapit sa ila nga isa ka concerned citizen kag nagpahayag nga may yara sang isa ka lalaki nga nagapanaya sang kutsilyo.
Suno kay Gilsa, gilayon nga ginrespondehan sang duha ka pulis ang amo nga alegasyon.
Dugang ni Gilsa, sang nag-abot ang duha sa lugar, ila gin-engganyo si Marquino nga buy-an ang ginakaptan nga kutsilyo apang ginsulong sila sini kag ginbuno si Pol Cpl Puyong.
Naigo sa index finger sa iya tu-o nga kamot si Puyong.
Ginpahayag sang natungdan nga makapila ka beses nga ginbuno ni Marquino ang nasambit nga pulis, gani nagtinguha ang pulis nga magpalupok apang indi niya mahimo tungod m16 ang dala niya nga armas.
Nahibaluan nga ang m16 man ang gingamit niya agud nga sagangon ang buno sang suspetsado kag gingamit nga warning paagi sa pagpalupok.
Sang indi na mapunggan si Marquino, nagbulig si Pol Cpl Caminian, nagpalupok, kag naigo sa tiyan si Marquino.
Gindala si Marquino sa Angel Salazar Memorial Hospital apang gindeklarar nga dead on arrival (DOA) sang attending physician samtang si Pol Cpl Puyong ang gindala man sa isa ka hospital.
Nakahanda naman ang San Remegio MPS nga sabton sa tion nga may yara sang magreklamo nga pamilya sang suspetsado nga may iregularidad nga natabo.
Samtang, ginpasalig naman sang mga witnesses nga mabulig sila sa kapulisan sa tion nga may magreklamo sang iregularidad.
Ang suspetsado ang ginapahayag nga may problema sa paminsaron kag nagapanaya-naya sa nasambit nga banwa sa tion nga siya ang abuton.
