ILOILO CITY – (Updated 8:20 am) Indi pa sa gihapon matumod sang otoridad ang identity sang lalaki nga nasapwan patay sa Brgy. Sooc, Arevalo, Iloilo City subong nga aga, Marso 6.
Ang amo nga biktima ang may yara sang duha ka pilas sa tuo nga nawong nga ginapahayag tuga sang pagpangluthang.
Ang lalaki ang nagasuksok sang duag pula nga shorts kag midnight-blue nga T-Shirt kag wala sang tsinelas.
Sang nasapwan ang biktima, nakatabon sa iya ulo ang iya jacket.
Sa interview sang Bombo Radyo kay PSSGT. Juan Parreño, imbestigador sang Arevalo Police Station, iya ginpahayag nga santu sa ila inisyal nga imbestigasyon, takna ‘la una sang aga sang may nabatian nga lupok ang mga residente sa lugar.
Wala man sang wallet, ID, ukon iban pa nga materyal nga mahimo makabulig sa pagkilala sa identity sang biktima.
SUNO SA MGA RESIDENTE.
Blangko man ang mga tawo sa lugar sa identity sang biktima.
Sa interview sang Bombo Radyo kay Elsie Sampani, isa sa mga pumuluyo sa amo nga barangay, iya ginpahayag nga santu sa istorya sang iya mga kasilingan, yara sa pito ka lupok ang nabatian takna ‘la una sa aga.
Suno kay Sampani, wala man sa gilayon nag-gwa ang mga residente bangud wala sila naglaum nga may yara sang krimen nga natabo.
Ginapahayag man nga may motorsiklo pa nga naglabay sang natabo ang krimen sang kaagahon.
Suno naman kay alyas Mylene, may isa siya ka abyan nga nagapahayag nga kilala niya ang biktima.
Dugang pa ni Mylene, santu sa istorya sang iya abyan, masami nga naga-videoke ang lalaki sa Brgy. Calaparan, Arevalo.
PADAYON ANG IMBESTIGASYON.
Sa subong, nagapadayon ang imbestigasyon ang Scene of the Crime Operatives (SOCO) sa lugar nga ginluntaran sang insidente.
Duha ka empty shells sang ginapahayag 45-caliber pistol ang na-recover sa crime scene.
