ILOILO – Patay na sang nasapwan sa talamnan ang isa ka lalaki sa Brgy.Tuburan Sta Barbara,Iloilo.
Ang biktima ginkilala nga si Elmo Susmiran,47 anyos sang nasambit nga barangay.
Sa interview sang Bombo Radyo kay Rosalie Susmiran, asawa sang biktima iya ginpahayag nga wala nakapauli kagab-i ang iya nga bana bangud nag inom-inom ini upod ang iya nga duha ka kumpare nga ginkilala nga sanday Nestor Lotero kag Armando Mogato.
Suno kay Rosalie, ginpasugat niya sa iya nga bata ang iya nga bana apang nasapwan na ini nga wala na sang kabuhi sa talamnan.
Dugang sang natungdan, wala na sang iban nga nakaaway ang iya nga bana maluwas sa ila tupad balay nga nakabaisay sini bangud sa away sa duta.
Posible man suno sa asawa sang biktima nga gintripingan lang kag gintambangan ang iya bana samtang nagapauli ini.
Maluwas sa gulgol sa liog naka agom man ang biktima sang pilas sa nagkalain-lain nga parte sang iya nga lawas.
Padayon naman ang ginapatigayon nga imbestigasyon sang kapulisan agud mahibaluan ang rason sang kamatayon sang biktima.
