Magasugod na ang pirmahanay sang loan agreement sang Iloilo City para sa pagatukuron nga Panay-Guimaras-Negros Bridge.
Sa interview sang Bombo Radyo kay Iloilo City Mayor Jerry Treñas, iya ginpahayag nga Hulyo subong nga tuig, magasugod na ang civil works sa amo nga proyekto.
Ginalauman naman nga matapos ang Panay-Guimaras-Negros Bridge sa Hunyo 2028.
Suno kay Treñas, nalipay siya nga naga-amat-amat na nga makit-an ang plano.
Samtang, ang tentative schedule para sa loan agreement ginlauman nga matigayon sa bulan sang Mayo.
Una na nga ginpahayag ni Engineer Sanny Boy Oropel, Regional Director sang Department of Public Works and Highways Region 6 nga wala naman sang makita nga deperensya sa desensyo ang National Economic and Development Authority (NEDA) kag magadirekta na sa procurement process.
Nahibaluan nga may duha ka sections ang proyekto, ini amo ang Section A nga Panay Guimaras Bridge nga may approximately 13.61 kilometers nga kalabaon.
Samtang, ang Section B naman amo ang Guimaras Negros Bridge nga may 19.47 kilometers ang kalabaon nga magakanektar sa isla sang Guimaras kag Negros.
Una na nga ginpirmahan ni Finance Secretary Ralph G. Recto ang kasugtanan kaupod kay South Korean Deputy Prime Minister Choi Sang-mok ang proyekto.
Ini ang may kabilugan nga gasto nga PHP 187.54 billion, sa diin pondohan sang Export-Import Bank of Korea (KEXIM) ang detalyado nga engineering design paagi sa kapin PHP 3.21 billion nga loan.
