ILOILO CITY- Nagapanawagan ang duha ka tigulang sa driver sang salakyan nga nag-sideswipe sa ila ginasakyan nga motorsiklo sa Quintin Salas, Jaro Iloilo City nga ulikdon man sila.
Sa interview sang Bombo Radyo kay Araceli Pelegrino, 66,angkas sang iya bana nga si Rodino Pelegrino,54, iya ginpahayag nga naghalin sila sa banwa sang Sta.Barabara kag padulong na kuntani sa Jaro agud magbayad sang ila nga hulogan nga motorsiklo sang nag- overtake kag na sideswipe sang sang awto rason nga natumba sila sa ila nga motor.
Suno sa iya, mahinay ang pagpadalagan sang motorsiklo sang iya bana kag sa insakto man sila nga lane apang nagdikit gid ang salakyan sa ila rason nga natumba kag nawasak ang ila nga signal light sa kag nautod ang hand brake sini.
Dugang pa niya, ginpanaugan kag gintulok gid lamang sila sang nakabunggo sa ila kag naghambal nga sila pa ang nang-agaw sang linya kag gilayon man ini nga nagsakay liwat sa iya salakyan kag nagbiya sa lugar.
Pareho nga nakaagom sang menor nga kapilasan sa lawas ang mag-asawa.
