Pasado na sa third and final reading sa Kamara ang kontrobersyal nga hagna nga ginduso agud mag-establisar sang Maharlika Investment Fund ukon ang sovereign wealth fund nga mahimo magamit sang gobyerno agud maghimo sang investments.
Naaprubahan ang House Bill No. 6608 paagi sa pagboto-pabor sang 279 ka mamalidha, anum ang nagpamatok, kag wala sang nag-abstain.
Madasig ang pagpasa sang amo nga hagna kasunod sang pag-certify ni President Ferdinand Marcos Jr. sa amo nga bill bilang urgent.
Bangud sini, nag-proceed ang Kamara sa third and final reading inoras lang matapos ang pagpasa sang hagna sa second reading – buot silingon, ginlaktawan na ang required nga tatlo ka session days nga interval sa normal kuntani nga procedure.
Kun wala ang certification ni Marcos, posible nga sa Enero 25,2023 pa maaprubahan sang Kamara ang bill, bangud recess sang Kongreso sa Disyembre 17 tubtub sa Enero 22 sa masunod nga tuig.
Kun balikan, ulihi na nga bahin sang Nobyembre gin-introduce ang proposal sang gin-file ini ni House Speaker Martin Romualdez, House Majority Leader Mannix Dalipe, presidential son kag Ilocos Norte 1st District Rep. Ferdinand Alexander Marcos, Marikina 2nd District Rep. Stella Quimbo, kag Tingog party-list Reps. Yedda Marie Romualdez kag Jude Acidre.
Napasaka ini gilayon sa plenaryo sang Disyembre 12, kag halin sang amo nga petsa, may marathon sessions nga ginpatigayon ang Kamara agud maakomodar ang interpellations kag ang ginaduso nga plenary amendments.
Apisar sang pagpamalabag sang publiko kag sang pila ka mga sektor kag apisar sang apelar sang opposition lawmakers nga i-delay lang kuntani ang pagpasar sang hagna kag hatagan sang ligwa ang pagpisa-pisa diri, natigayon gid nga nakalusot sa final reading.
Anum gid lamang ka mga mamalidha ang nagpamatok sa measure paagi sa pagboto sang “No.” Ini amo sanday:
* Camarines Sur 3rd District Gabriel Bordado
* Gabriela Representative Arlene Brosas
* ACT Teachers Representative France Castro
* Basilan Representative Mujiv Hataman
* Albay 1st District Representative Edcel Lagman
* kag ang Ilonggo nga Kabataan Representative, si Rep. Raoul Manuel
Suno kay Bordado, apisar maayo ang intensyon sang Sovereign Wealth Fund, dapat nga himuon ini sa husto nga tion — indi subong nga tion bangud wala sang surplus ang pungsod agud nga mag-invest sa Maharlika Investment Fund.
Ginpaathag man sini nga P13.64 trillion ang utang sang national government, apang kulang naman ang national budget.
Suno naman kay Castro, indi kuntani kinahanglan nga i-certify nga urgent ang House Bill No. 6608 bangud indi na ini kinahanglan sang mga tawo nga lubong naman sa utang, ilabi na subong nga tion sa tunga sang nagasaka nga presyo sang balaklon, manubo nga sweldo, kag iban pa nga problema sa ekonomiya.
Kuhaon sang sovereign wealth fund ang seed capital sini nga P110 billion halin sa dividends sang Bangko Sentral ng Pilipinas amo man sa investible funds sang Land Bank of the Philippines kag Development Bank of the Philippines. ##
