OTON, ILOILO – Nagdepensa ang Oton Municipal Police Station sa alegasyon sang punong barangay sang Mambog, Oton, Iloilo nga tuman ka hinay ang pagresponde sang mga pulis sa natabo nga pagpangluthang-patay sa ila lugar kaina sang aga.
Matandaan nga santo sa pahayag ni Punong Barangay Vanessa Salinas, kapin isa pa ka oras antes nakaabot ang mga pulis kag nagrason pa ang mga ini nga kuntani landline ang ila gintawgan sa baylo nga cellphone bangud wala sang ringtone ang cellphone.
Nalab-ot sang Bombo News Team ang imbestigador nga si Police Staff Segeant Johaness Sorongon.
Sa interview sang Bombo Radyo kay Sorongon, amo naman ini ang natabo:
Wala nasabat ang tawag sang punong barangay bangud wala sang ringtone ang cellphone.
2:59 sang kaagahon natabo ang krimen apang santo sa naka-screenshot sa call log sang Oton MPS, 3:23 sa kaagahon kag 3:25 sa kaagahon naka-register ang missed calls.
3:32 sang kaagahon sang nag-abot mismo sa talatapan sang Oton MPS ang ginsugo nga tawo sang Punong Barangay kag amo pa lang nakahibalo ang mga pulis may kaangtanan sa shooting incident.
Suno kay Sorongon, sa ila nga bahin, mahulag lang sila kag makaresponde kun makaabot na sa ila ang impormasyon.
Ginpanginwala man ni Sorongon nga na-inform sila sang Oton Search and Rescue Team (OSART) may kaangtanan sa amo nga insidente.
