ILOILO CITY – Ginatuman sang Muslim Community sa syudad sang Iloilo ang mga pagsulundan sang Department of Health (DOH) may kaangtanan sa mga aktibidad sang grupo sa pagsugod sang Ramadan subong nga adlaw sang Biyernes, Abril 24.
Ini ang kasunod sang mandu nga ginpa-gwa sang National Commission on Muslim Filipinos sa temporaryo nga pagsuspinde sa Taraweeh ukon community prayer sa mga prayer rooms kag mosque sa bug-os nga pungsod.
Sa interview sang Bombo Radyo kay Sultan Sammy Hadji Manan, tagpamaba sang Iloilo Muslim Community Association, iya ginpahayag nga ginakasubo nila ang mga pagbag-o sang pag-obserbar sang Ramadan subong nga tuig bangud sang coronavirus disease 2019 (COVID-19) pandemic.
Sa pihak sini, suno sa natungdan, handa ang Iloilo Muslim Community nga sundon ang social distancing measure paagi sa pagpaiway sang pagtilipon kag sa baylo, patigayunon na lamang ang pagpangamuyo sa sulod sang balay.
Pahayag ni Sultan Manan, sang wala pa ang COVID-19 outbreak, ang Ramadan amo ang isa sa pinakamasadya nga okasyon para sa mga Muslim ilabi na sa mga kabataan nga ginadala sang ila mga ginikanan sa hulot-palangadian.
Sa subong, may yara man sang nagapadulong sa simbahan apang limitado lamang ini sa mga Muslim nga yara nagapuyo malapit sa lugar, may quarantine pass, kag ang importante, nagatuman sa gihapon sang physical distancing.
Nahibaluan nga ang iban pa nga gina-obserbar sa Ramadan amo ang fasting, pagpangamuyo sang lima ka beses sa sulod sang isa ka adlaw, paghatag sang “zakat” ukon limos sa mga pigado, kag para sa mga may sarang — pag-peform sang hajj ukon pilgrimage sang makaisa sa ila bilog nga kabuhi.
