ILOILO CITY- Ginbida ni Iloilo City Mayor Jerry Treñas sa iya State of the City Address ang tatlo ka nagapanguna nga achievements sang syudad nga nagapakita sang kabakod, kapag-on kag pag-ugyon.
Ini ang ginalakipan sang pagbaton sang syudad sang 2019 sang prestihiyoso nga ASEAN Clean Tourist City Award, ang pagbansag sa syudad bilang Wakanda of the Philippines sang 2020 sa tunga sang COVID-19 pandemic kag ang natuman nga mga Public-Private Partnership projects.
Suno sa alkalde, ini nga kadalag-an ang padayon nga nagapasanyog sang economic activities sa syudad, nagpadamo sang mga negosyo, investment, tourist arrivals, kag nagpataas sang employment rate.
Ginplastar man ni Treñas ang roadmap agud dal-on ang Iloilo City bilang isa sa Top 3 Most Competitive Highly-urbanized Cities in the Philippines sa 2028.
Suno sa alkalde, ini nakasandig sa apat ka mga haligi nga ginabug-usan sang Environmental Sustainability, Resilient Infrastructure, Innovative Economic Development, kag Responsive and Inclusive Human Development.
Ginpresentar man sang alkalde ang bag-o nga tagline para sa tourism campaign nga amo ang “My heart beats in Iloilo City” nga kabahin sang handom nga ma-establish ang syudad bilang matahum nga destinasyon kag nagatanyag sa mga turista kag investors sang madamo nga oportunidad.
Gindayaw ni Iloilo City Councilor Sedfrey Cabaluna ang State of the City Address ni Mayor Jerry Treñas partikular ang ginplastar sini nga road map.
Sa interview sang Bombo Radyo kay Cabaluna, iya ginpahayag nga bilang opisyal man kag pumuluyo sang syudad, ang dapat nga himuon amo ang suportahan ang alkalde padulong sa amo nga direksyon.
Sa interview naman sang Bombo Radyo kay Councilor Johnny Young, iya ginpahayag nga ang State of the City Address sang alkalde ang repleksyon sang kun paano nagsanyog ang ekonomiya sang syudad sa idalom sang liderato ni Treñas.
