Liwat nga nagpahanumdom si Mayor Jerry Treñas sa Iloilo City District Engineering Office (ICDEO) sang Department of Public Works and Highways (DPWH) Region 6 sa ila paghatag sang update sa alkalde kag sa congressman kaangot sa mga proyekto sang syudad.
Sa interview sang Bombo Radyo kay Joy Fantilaga, spokesperson ni Iloilo City Mayor Jerry Treñas, iya ginpahayag nga nagakabalaka ang bahin sang syudad bangud nagapabilin nga wala sang sabat ang nasambit nga talatapan.
Una na nga wala nanamian ang alkalde sa indi pagsabat sang ICDEO sa ila hingyo nahanunungod sa financial status sang mga proyekto nga nakahamtang sa duta sang Iloilo City.
Nahibaluan nga 2015 pa lang sang nakasaad sa mandate sang DPWH nga nagakadapat nga maghatag sang detalye ang nasambit nga opisina sa syudad nahanungod sa ‘progress’ sang isa ka proyekto.
Suno kay Fantilaga, nalakip sa mandu amo ang paghatag sang listahan sang mga proyekto, implementation schedule, kag monthly progress sini sa idalom sang Project Monitoring System (PMS).
Matandaan nga ginkadismaya sang alkalde ang nangin lihok sang ni ICDEO Head Roy Pacanan nga indi pag-attend sa ginpatawag nga pagsinapol sang nagligad nga Marso 7, 2025.
