ILOILO CITY- Indi magpang-alang-alang si Iloilo City Mayor Jerry Treñas nga himuon sa Public Safety and Transportation Management Office ang iya ginhimo sa iban nga mga opisina sa Iloilo City Government nga may yara sang natabo nga mga anomaliya kag pagpabaya sa katungdanan.
Sa interview sang Bombo Radyo kay Mayor Jerry Treñas, iya ginpahayag nga tuman ini ka dismayado sa opisina nga ginapamunuan ni Mr. Jeck Conlu bangud sa mga reports sang pagpangilkil kag madamo nga violations kag obstruction sa bike lane.
May kaaangtanan sa posible pagpakakas sa mga personnel sang amo nga opisina, ginpahayag sang alkalde nga indi niya anay ini pagpangunahan.
Madumduman nga sang damlag lang, ginpang- terminate sang alkalde ang mga jobhires sang Iloilo City Urban Poor Affairs Office kag gin-dismiss ang 29 ka iban pa bangud sa anomaliya nga naangot sa pagbaligya sang mga relocation sites sang syudad.
Nagalaum naman ang alkalde nga sa tion nga mapaidalom sa re-training ang mga tinawo sang Public Safety and Transportation Management Office, may improvement na sa ila mangin performance.
