ILOILO CITY – Positibo si Iloilo City Mayor Jerry Treñas nga aprobahan sang Regional Inter-Agency Task Force ang iya hingyo nga pahanugutan ang 75% capacity sa tagsa ka kalan-an sa syudad sang Iloilo.
Ini ang kasunod sang inspection nga ginpatigayon sang alkalde sa tagsa ka mall sa syudad kun sa diin iya nakita nga ginasunod ang minimum health strandards.
Sa interview sang Bombo Radyo kay Treñas, iya ginpahayag nga kun tani pahanugutan lang sang Regional Inter-Agency Task Force ang iya hingyo nga 75% capacity sa tagsa ka kalan-an kag pahanugutan nga makakaon sa isa lang ka lamesa ang mga magpamilya.
May kaangtanan naman sa ginapatuman nga physical distancing measure, ginpahayag ni Treñas nga pahanugutan anay ang angkas sa motorsiklo sa bug-os nga syudad tubtub nga makapaguwa na sang final decision ang National Inter-Agency Task Force.
May yara naman sang Executive Order ang alkalde nga nagamandu nga epekto Hulyo 10, 11:00 sa gab-i tubtub 4:00 sa kaagahon na ang curfew.
Wala naman sang problema sa natungdan ang pagpauntat sang suspension sa pagpauli sang mga Locally Stranded Individuals sa syudad sang Iloilo.
Suno kay Treñas, batunon sa syudad sang Iloilo ang mga magapauli nga Ilonggo apang kinahanglan lang nga magsunod sa protocol.
Kabahin diri suno sa alkalde ang pagpaidalom sa COVID-19 test kag istrikto nga facility quarantine.
Kun klase naman ang pagahambalan, ginpahayag ni Treñas nga padayon ang iya nga pagpakig-angot sa Department of Education may kaangtanan sa nagahilapit nga pagbukas sang klase sa Agosto 24.
Sa pagkamatuod suno kay Treñas, may yara sang webinar nga ginpatigayon agud istoryahan ang tuhoy sa mga pagpanghanda nga dapat himuon kag kun ano ang mga kinahanglanon sa online classes kag modular learning.
