Wala na ginasapak ni Iloilo City Mayor Raisa Treñas ang posible nga pamulitika sa naglupok nga isyu sa Assistance to Individuals in Crisis Situation (AICS).
Ini matapos nga nalakip ang duha ka mga empleyado sang Iloilo City Hall sa 14 ka mga indibidwal, 12 diri ang mga barangay officials, sa ginpasakaan sang kaso sang Department of Social Welfare and Development (DSWD) sa Office of the Ombudsman matapos ginaalegar nga nagpangbuhin sang AICS sang mga pumuluyo.
Sa interview sang Bombo Radyo sa alkalde, iya ginpahayag nga kun sapakon niya ini, madula siya sa iya nga goal bilang pinuno sang syudad.
Suno sa iya, ginatugyan na lang niya sa City Legal Office ang paghatag atensyon sa amo nga isyu.
Nahibaluan nga ang mga involved nga city hall employees amo sanday Joebert Lim kag si Johnny Paul Dizon nga naga-duty sa Atipan Center .
Suno man sa alkalde nga iya pa nga ginahibalo ukon ginareview ang status sang mga Job Order angot sa duha ka empleyado sang city hall.
