Gin-athag sang Department of Health nga may yara pa sang dugang nga insentibo nga mabaton ang mga volunteer healthcare workers subong nga COVID-19 pandemic.
Ini matapos nga ginpakamalaot sang mga netizens ang P500 daily allowance nga kompensasyon sang Department of Health sa mga volunteer healthcare workers.
Suno kay Department of Health Undersecretary Maria Rosario Vergeire, magluwas sa daily allowance may yara pa sang libre nga pagkaon kag ilistaran ang mga volunteers.
Ipatuman man sang nasambit nga ahensya ang ‘2 weeks on, 2 weeks off’ scheme sa diin may window period para sa self-quarantine ang volunteer healthcare workers.
Dugang sang natungdan, apisar wala sang trabaho kag naka quarantine may yara sa gihapon sang mabaton ang mga volunteer gikan sa Department of Health lakip na ang iban pa nga insentibo nga ila mabaton.
Magluwas diri, makabaton man sila sang special risk allowance, hazard pay kag transport allowance.
Sabton naman sang Philhealth ang tanan nila nga gastos sa tion nga malatnan sila sang COVID-19 samtang yara sa trabaho.
Sa tion nga mangin kritikal ang ila nga kondisyon, makabaton sila sang P100,000; P1 milyon naman ang mahimo nga mabaton sang ila nga pamilya sa tion nga magtaliwan sila bangud sa nasambit nga balatian.
Madumduman nga una na nga naghingyo sang pasaylo ang Department of Health sa sektor sang mga healthcare workers bangud sa reklamo sang kadam-an nga indi bastante ang ila nga ginabaton.
