ILOILO CITY – Nagpaandam ang OCTA Research nga ang Omicron BQ.1 nga sublineage sang highly transmissible nga BA.5 subvariant nga na-detect sa pungsod ang mahimo nga mangin rason sang liwat nga pagsaka sang kaso sang coronavirus disease 2019 kag sang positivity rate.
14 ka mga kaso sang BQ.1 ang na-detect base sa pinakaulihi nga genome sequencing sang UP-Philippine Genome Center, Research Institute for Tropical Medicine, kag San Lazaro Hospital humalin sang Oktubre 28 tubtob sa Nobyembre 18.
Suno kay OCTA Research fellow Dr. Guido David, base sa data, ang numero sang nagkalamatay kag sang na-ospital ang wala nagtaas sa iban nga pungsod bangud sang BQ.1.
Kalabanan sang mga kaso ang mild kag asymptomatic apang wala nagakahulugan nga ang omicron ang mild gid lamang.
Ini bangud nga bakunado ang tawo kag ang proteksyon batuk sa severe infection sang balatian ang mas mabaskog.
Bangud sini, nagpaandam si David nga indi magkumpiyansa bangud nga bisan bakunado, mahimo sa gihapon nga ma-igo sang delikado nga coronavirus disease 2019.
Gani suno sa iya, indi ini pagbalewala-on apang wala man niya ginasiling nga indi na maggwa sa balay kundi mag-doble halong lamang.
