ILOILO CITY – Naghatag ang punong barangay sang Bo. Obrero, Lapuz sang duha ka adlaw sa mga pumuluyo nga himuson ukon higtan ang ila mga hinuptanan nga ido agud malikawan ang insidente sa pagpangagat.
Sa interview sang Bombo Radyo kay Punong Barangay Ricardo Diño Jr., iya ginpahayag nga tubtob Byernes sa gab-i ang iya ginahatag nga ultimatum sa pumuluyo.
Suno kay Diño, sa tion nga may makita siya nga layaw ukon nagalagaw nga ido, ila ini nga dakpon kag iga-turn over sa otoridad.
Ini matapos man ang makaalarma nga insidente nga natabo sa pamilya Paredes sa ila barangay sa diin tatlo ang pilas sang isa ka lalaki matapos ginkagat sang ila hinuptanan nga ido.
Kaina sang aga suno kay Diño, personal siya nga naglibot sa lugar kag naghatag sang panugyan sa mga tag-iya.
Ginpahayag sang natungdan nga madugay na nga may mga nagalagaw nga ido sa ila lugar, apang daw indi man ang mga ini mapintas apang subong, suno sa iya, ila na pagahugtan ang mga tikang agud masigurado ang kahilwayan sang mga tawo batok sa rabies.
