Ginalagas sang rescuers ang oras agud nga makasalbar sang mas madamo pa nga mga tawo kasunod sang duha ka mabaskog nga linog nga nagtay-og sa Venezuela.
Sandig sa aid agencies, kritikal ang 48 tubtub 72 ka oras sa ginapatigayon nga rescue agud masiguro nga buhi ang mga biktima nga natabunan sang mga debris ukon narumpagan sang mga building.
Lampas na sa 72 oras halin sang natabo ang magnitude 7.2 kag magnitude 7.5 nga linog.
Sini nga weekend, may 33 ka mga indibidwal nga na-rescue sang civilian volunteers kag foreign rescue workers.
Nagsaka naman ang numero sang nagkalamatay sa 1,400 kag 3,238 ang nasamaran.
Lakip sa mga nagkalamatay amo ang foreign nationals kun sa diin may 28 nga Portuguese, siyam nga Spaniards, pito nga Chinese, duha ka Brazilians, isa ka Chilean, isa ka Italian-Venezuelan, kag isa ka Uruguayan.
Kun basehan ang gobyerno sang Venezuela, ginatos ang missing kag ginapatihan nga na-trap, apang sandig sa website nga ginagamit sang oposisyon, 50,000 pa ka mga tawo ang wala gihapon nakit-an.
Ginabanta naman sang U.S. Geological Survey nga magalab-ot sa masobra 10,000 ang numero sang patay sa amo nga linog nga amo ang magahimo sa nagluntad nga twin earthquakes bilang pinakamakamamatay nga linog sa Latin America sa nagligad nga isa ka siglo.
Sandig naman sa UN migration agency, lab-ot sa 6.76 million sa populasyon ang apektado nga nagakinahanglan sang puluy-an, matinlo nga tubig kag pagkaon, pagbulong, kag iban pa nga relief items.
