ILOILO CITY – Ginsapol ni President Ferdinand “Bongbong” Marcos Jr. ang mga top food manufacturers agud nga hambalan ang suplay sang kalamay sa pungsod kag ang presyo sang pagkaon.
Sa Facebook post sang Office of the President, gindiskusyunan sang presidente kag sang myembro sang Philippine Chamber of Food Manufacturers ang mga pamaagi agud nga masolbar ang ginakabalak-an nga pagnubo sang suplay sang kalamay.
Nagpangako ang presidente nga magadihon sang sistema agud nga ma-manage ang pagsaka sang presyo kag agud nga magapadayon ang operasyon sang mga negosyo kag mapasigurado ang job security.
Kung madumduman, una na nga ginbasura ni Marcos ang order sang Sugar Regulatory Board nga mag-import sang 300,000 metric tons sang kalamay nga nagresulta sa pagpanaog sa pwesto sang pila ka mga opisyal.
Apang sang weekend, ginpahayag niya nga posible nga kinahanglan sang pungsod nga mag-import sang kalamay sa bulan sang Oktubre apang indi kaangay kadamo sang una nga gin-propose sang regulatory board.
