Ginlaragway sang director sang Jaro Archdiocesan Social Action Center nga ‘tumalagsahon’ ang nangin akto sang chief sang Philippine National Police (PNP) nga pa-imbestigaran sang maid-id ang kontrobersyal nga drug buy bust operation sa North Baluarte, Molo, Iloilo City sang Hunyo 29 kun sa diin patay ang isa ka lalaki nga ginapahayag nasal-an lang nga subject.
Una diri, nagpahayag si PNP Chief Police General Guillermo Lorenzo Eleazar nga dapat hibaluon kun may yara sang operational lapses ukon kapaltahan ang mga pulis sang ginpatigayon ang operasyon.
Imbestigaran man ang ginapahayag mistaken identity sa kaso bangud ang ginluthang-patay sang pulis amo si Karl Daniel Bolante, 27, residente sang North Baluarte Molo, Iloilo City bisan ang matuod nga subject amo si Dave Mendoza, 23, residente sang Rizal Pala-Pala 2, Iloilo City Proper.
Sa interview sang Bombo Radyo kay Msgr. Meliton Oso, iya ginpahayag nga nagasalig siya sa bag-o nga PNP chief bangud ang iya pagmandu sang imbestigasyon sang nagapakita lang nga luyag niya nga masaligan ang police personnel sa idalom sang iya nga administrasyon.
Ginpaanggid pa ni Oso si Eleazar sa previous PNP chiefs kag ginpahayag nga lain ini sa iban bangud ginapahayag wala man nagsapak ang iban nga PNP chief kun may kapaltahan ang pulis sa mga operasyon.
PLANTED NGA EBIDENSYA SA DRUG BUY BUST OPERATIONS?
Masami nga ginarason sang mga madakpan sa drug buy bust operation nga ginatamnan sila sang ebidensya. Ini man ang sentimyento sang mga nagakaladakpan. May yara man nga baliskad ang pahayag sang pulis sa makit-an sang tawo sa footages sang closed circuit television (CCTV).
May kaangtanan diri, pahayag ni Oso: “Mataas na ang inyo nga sweldo. Serbisyuhi kami sang maayo. Respetuha ang amon nga kinamatarong!”
Tama ka daku ang sweldo sang pulis suno kay Oso — butang nga dapat patasan man sang maayo kag husto nga serbisyo.
“Ang husto nga serbisyo wala nagakahulugan nga mag-shortcut ka. Sundon mo ang matarong nga paagi. Tahuron mo ang kinamatarong sang tawo kag sang publiko,” pahayag ni Oso.
Dismayado man ang natungdan nga wala gihapon nasuksok ang body cameras nga amo kuntani ang makasugid kun husto ang proseso sang mga pulis sa operasyon.
“Abi ko indi na ini matabo kay abi ko nag-abot na ang body cameras. Kun gingamit tani ang body cameras, tani wala na sang baylo-baylo ang mga sugilanon. How I wish nga magamit na ina gilayon kay una, proteksyon ina sang pulis kag ikaduha, proteksyon ina sang mga sibilyan,” dugang pa ni Oso.
