Apisar sang nagataas pa nga geopolitical tensions sa tunga sang Estados Unidos kag Russia, ginpalupad sang SpaceX kag sang National Aeronautics and Space Administration (NASA) sa International Space Station (ISS) ang rocket sakay ang crew sang astronauts lakip na ang isa ka Russian cosmonaut.
Naghalin ang rocket sa Kennedy Space Center sang NASA sa Florida sang Myerkules sang hapon kag natalana nga mag-abot sa space station antes ang ‘las singko sa Huwebes sang hapon.
Isa sa passengers sang mission amo ang Russian cosmonaut nga si Anna Kikina sang Roscosmos, ang State Space Corporation sa Russia.
Ginapahayag nga ang iya nga presensya sa amo nga spacecraft ang nagapakita nga may kooperasyon sa gihapon sa tunga sang Estados Unidos kag Russia pag-abot sa International Space Station. Ini ang sa pihak sa nagataas nga tensyon sa duha ka pungsod bangud sa pag-invade sang Russia sa Ukraine.
Ang iban pa nga crew members sa amo nga flight amo sanday Nicole Mann kag Josh Cassada sang NASA kag si Koichi Wakata sang Japanese space agency nga Japan Aerospace Exploration Agency.
Tunga sa tuig ang kalawigon sang tinir sang amo nga crew ukon Crew 5 sa space station.
Ini ang ikaanum nga astronaut flight nga ginalupad bilang joint endeavor sa tunga sang NASA kag SpaceX sa space station.
Maragtason man ini bangud si Mann amo ang labing-una nga Native American woman nga magabyahe sa space kag siya man ang naga-serbe nga mission commander, kag ang una nga babayi nga nag-abaga sang amo nga katungdanan para sa SpaceX mission. Isa si Mann ka Marine Corps pilot nga myembro sang Wailacki tribe sang Round Valley Indian Tribes.
Si Kikina naman ang una nga Russian nga nakaupod sa SpaceX mission bilang kabahin sang deal sa tunga sang NASA kag sang space agency sang Russia. Ang amo nga deal ang ginpirmahan sang nagligad nga Hulyo.
Pag-abot sa ISS, buylugan sang crew ang pito ka astronauts nga yara na nga daan sa space station nga nagalakip sa apat ka NASA astronauts, isa ka European Space Agency astronaut, kag duha ka Russian cosmonauts.
May yara sang handover period kun sa diin ang buligan anay sang current ISS crew nga maka-settle ang bag-o nag-abot nga astronauts.
Pagkatapos sini, may yara sang Crew Dragon spacecraft nga magasakay-pauli sa apat ka astronauts nga kabahin sang SpaceX’s Crew-4 mission. ##
