Nagdangat sa 295 ka pamilya sa diin katumbas sini ang 1,028 ka indibidwal ang ginpang-evacuate kasunod sang paglaslas ni Bagyong Dante sa Western Visayas.
Sa interview sang Bombo Radyo kay Cindy Ferrer, information officer sang Office of Civil Defense (OCD) Region VI kag spokesperson sang Regional Task Force, iya ginpahayag nga base sa ila nabaton nga data, 31 ka pamilya ang gin-evacuate sa probinsya sang Capiz, 93 ka pamilya sa Negros Occidental, duha ka pamilya sa Aklan kag 169 ka pamilya sa Balasan, Iloilo.
Suno kay Ferrer, sa subong, ginahulat na lang nila ang kompleto nga report sang Provincial Disaster Risk Reduction and Management Office (PDRRMO) kun nakapauli na ang tanan nga gin-evacuate sa ila nga mga balay.
Ginpahayag ni Ferrer nga bangud man sa bagyo Dante, nagsaka sa 900 ang numero sang mga pasahero nga nastranded sa mga pantalan sa Western Visayas santo sa rekord sang Philippine Coast Guard.
Samtang, ginpahayag ni Ferrer nga sa bahin sang probinsya sang Capiz, nagapadayon naman ang search and rescue operation sang Municipal Disaster Risk Reduction Management Council sa apat ka mga na-missing nga ginapahayag lunsay mga manugpangisda.
Ginpahayag ni Ferrer nga sa apat ka na-missing nga lunsay residente sang Barangay Binaobawan, Pilar, Capiz, duha diri ang menor de edad.
