ILOILO CITY – Nagdangat na sa 53 ang positibo nga kaso sang Coronavirus Disease 2019 (Covid-19) sa Western Visayas.
Ini matapos na ginkumpirma sang Department of Health Western Visayas Center for Health Development ang isa ka bag-o nga kaso sang COVID-19.
Suno kay Dr. Renilyn Reyes Public Health Program Division Cluster Head kag COVID-19 spokesperson sang Department of Health Region VI ang nasambit nga pasyente amo ang WV #53 nga isa ka 42-anyos nga lalaki gikan sa La Castellana, Negros Occidental.
Dugang sang natungdan, ang nasambit nga pasyente ang nakaclose contact man ni WV #37 kag #38 nga gikan sa banwa sang Pavia, Iloilo kag ginapahayag driver sang mag-asawa.
Ginrelease naman sang Western Visayas Medical Center sub-national laboratory ang 241 ka mga resulta sang laboratory sa diin isa ang nagpositibo kag 240 ang nagnegatibo.
Liwat naman nga gin-athag ni Reyes nga obligado ang mga pasyente nga isugid ang ila mga personal impormasyon sa mga doktor para sa mas madasig nga pagpatigayon sang contact tracing sa ila mga nakaupod.
Suno kay Reynes, base sa ila pagsulundan nagakadapat nga i-report ang tanan nga impormasyon may kaangtanan sa mga pasyente nga nagpositibo sa nasambit nga balatian sa mga ahensya nga nagakinahanglan sini.
Sa pihak sini, nagakadapat man nga siguraduhon nga insakto ang mga impormasyon kag maprotektahan ang mga pasyente batok sa pagpangbastos kag pagkamalaot.
